Masallı Regional Mədəniyyət İdarəsinin tabeliyində olan uşaq musiqi və incəsənət məktəblərindəki rəhbər vəzifələrə yeni təyinatlar olub. Belə ki, İdarənin müvafiq əmrinə əsasən Fərhad İlqar oğlu Qurbanov Masallı şəhər Onbirillik İncəsənət Məktəbinin, Azər Ağamusa oğlu Əhədzadə isə Cəlilabad şəhər Uşaq İncəsənət Məktəbinin direktoru vəzifələrinə təyin olunublar. Sentyabrın 29-da İdarə rəhbərliyinin iştirakı ilə yeni direktorlar sözügedən təhsil müəssisələrinin pedaqoji kollektivlərinə təqdim olunub.

Tədbir vətənimizin bütövlüyü uğrunda canından keçmiş şəhidlərin xatirəsinin bir dəqiqəlik ehtiramla yad edilməsi ilə başlayıb.

Tədbirdə çıxış edən İdarə rəisi Bəxtiyar Qılıncov əvvəlcə yeni tədris ilinin başlanması münasibətilə təhsil müəssisələrinin müəllim və şagirdlərini, eləcə də məktəblərin yeni rəhbərlərini təbrik edib, onlara yeni tədris ilində uğurlar arzulayıb. Rəis sonra Nazirlik sistemində aparılan islahatlar və optimallaşdırma tədbirləri, müvafiq sahə üzrə yeni çağırışlar, prioritet vəzifələr barədə danışıb, yeni hədəflərlə bağlı düşüncələrini tədbir iştirakçıları ilə bölüşüb.

Sonra təhsil müəssisələrinin yeni rəhbərləri göstərilən etimada görə İdarə rəhbərliyinə minnətdarlıq edib, onlara bəslənən inamı doğruldacaqlarını bildiriblər.

Tədbir təhsil müəssisələrinin fəaliyyəti, əldə olunan uğurlar və çatışmazlıqların, həmçinin digər məsələlərin müzakirəsindən sonra yekunlaşıb.