28.03.2024
Masallı Tarix -Diyarşünaslıq Muzeyinin təşkilatçılığı ilə Babaser kənd ümümorta məktəbində 31 Mart-Azərbaycanlıların Soyqırımı Günü ilə əlaqədar olaraq “ Mart soyqırımı – tarixin bir günü” mövzusunda tarix dərsi keçirilib.
Əvvəlcə soyqırımı qurbanları və Azərbaycanın suverenliyi , azadlığı uğrunda canından keçənlərin xatirəsi bir dəqiqəlik sükutla yad edilib.
Muzeyin kiçik elmi işçisi Nazənin Heydərzadə tarix dərsində 1918-ci ilin mart ayından etibarən “əksinqilabçı ünsürlərlə mübarizə” şüarı altında Bakı Kommunası tərəfindən ümumən Bakı quberniyasını azərbaycanlılardan təmizləmək məqsədi güdən mənfur plan həyata keçirilməyə başlamasından , həmin günlərdə ermənilərin törətdikləri cinayət əməllərinin Azərbaycan xalqının yaddaşına əbədi həkk olunmasından və bu günün ilk dəfə ulu öndər Heydər Əliyev tərəfindən 26 mart 1998-ci il tarixdə 31 mart Azərbaycanlıların Soyqırımı Günü kimi qeyd olunması barədə imzaladığı sərəncamdan danışıb.
Sonra muzeyin əməkdaşı Sevinc Əliyeva mövzu ilə bağlı geniş məruzə edərək həmin günlərdə minlərlə dinc azərbaycanlı əhalinin yalnız milli mənsubiyyətinə görə məhv edilməsi , ermənilərin evlərə od vurması, insanları diri-diri yandırması, milli memarlıq incilərini, məktəbləri, xəstəxanaları, məscid və digər abidələrin dağıdılmasından söhbət açıb. S. Əliyeva Azərbaycanlılara qarşı aparılan soyqırımı siyasətinin xronologiyasını xatırlayaraq, , xalqımıza münasibətdə törədilən vəhşilik və cinayətlərin heyrət və qəzəb doğurmasını xüsusi vurğulayıb.
Yekunda məktəblilərin mövzu ilə bağlı sualları cavablandırılıb.