19.01.2024
Lerik Rayon Heydər Əliyev Mərkəzində Lənkəran-Astara Regional Gənclər və İdman İdarəsinin Lerik rayonu üzrə gənclər və idman sektorunun və Mərkəzin təşkilatçılığı ilə 20 Yanvar faciəsinin 34 -cü ildönümü ilə əlaqədar "Ümummilli Lider Heydər Əliyev və 20 Yanvar həqiqətləri" mövzusunda tədbir keçirilib.
Tədbir Lerik rayonu üzrə gənclər və idman sektorunun, Heydər Əliyev Mərkəzinin əməkdaşlarının, Lerik Peşə Məktəbinin şagird və müəllim heyətinin və rayon gənclərinin iştirakı ilə baş tutub.
İlk öncə tədbir iştirakçıları 20 Yanvar faciəsinin qurbanlarının əziz xatirəsini bir dəqiqəlik sükutla yad ediblər.
Daha sonra çıxış edənlər faciə barədə gənclərə geniş məlumat verərək, Ulu Öndər Heydər Əliyevin 20 Yanvar faciəsinə siyasi qiymət verilməsi və dünya ictimaiyyətinə çatdırılmasından, 20 yanvar hadisələri zamanı öz həyatını böyük təhlükə altına ataraq, keçmiş SSRİ rəhbərliyinə qətiyyətli mövqe bildirməsindən bəhs ediblər.
Sonda tədbir iştirakçılarına "20 Yanvar həqiqətləri" qısametrajlı filmi nümayiş edilib.