11.04.2023
Aprelin 11-də Masallı Tarix-Diyarşünaslıq Muzeyində “Uşaqlara dair Strategiyanın həyata keçirilməsi üzrə 2020-2025-ci illər üçün Fəaliyyət Planı” çərçivəsində “ Zərərin məhdudlaşdırılması üçün etik qaydaları öyrənək” mövzusunda tədbir keçirilib.
Rayon İcra Hakimiyyətinin təşəbbüsü, muzeyin və Lənkəran-Astara Regional Təhsil İdarəsinin Masallı rayonu üzrə Təhsil sektorunun birgə təşkilatçılığı ilə keçirilən tədbirdə Sakit Tağıyev adına şəhər 4 saylı tam orta məktəbin müəllim və şagirdləri iştirak edib. Əvvəlcə şəhidlərin əziz xatirəsi bir dəqiqəlik sükutla yad edilib.
Muzeyin direktoru Əntiqə Tağıyeva və elmi işçi Dilgüşə Məmmədova çıxışlarında etik qaydaların işığında azyaşlıların diqqət etməli olduqları məsələlərdən və çətin hallarda düzgün nəticələr çıxarmaqla bağlı hallardan söz açaraq şagirdlərə müvafiq tövsiyələr veriblər. Sonra uşaqlara mövzu ilə bağlı müəyyən suallar verilərək ,onlarla fikir mübadiləsi aparılıb.
Sonda iştirakçılar muzey və qalereyaya ekskusiya edərək regionun tarixi, adət ənənələri, qəhrəmanları, tanınmış şəxsiyyətləri, rəngarəng rəsm tabloları ilə tanış olublar.